EPIGRAM BALADEWA
ing grojogan sewu dheweke mesu budi
lantipe si adhi sapa bisa nandhingi
bendhe tengara kang muni ngangkang
cumenthel ing awang-awang
adhuh, yayi
sapa kang kwagang nyapih perang?
2013
ya iki tresna sing dakbangun saka lemah wutah getih
lajere lelabuhan sing manjing dhadha tan kena pilah-pilih
kalane perang brubuh nakonake sapa madeg senapati
raga sempal daklakoni, pecating nyawa bakal dakwujudi
geneya sliramu api-api ora ngerti
2013
EPIGRAM DRONA
aja disengguh emban cindhe emban siladan
kabeh siswa dakteter kawasisan lan kalantipan
he, kurawa pandhawa aja mung adu panyawang
sapihen panantang tumuli tigasen awang-awang
nanging geneya dhadhamu kumetab sar-saran?
2013
EPIGRAM LIMBUK
daklarung sakehing sesuker lan memala
ing sungapaning kali Gangga
jiwa-jiwa kadhung kabotan sanggan
pakem crita morak-marik digawe carangan
ah, lajer-mentesing lelipur
aja dipadhakake kandele wedak pupur
2013
*ilustrasi gambar: http://4.bp.blogspot.com/
0 comments:
Post a Comment