SOLAH PINILIH

nalika mudhun lemah
cempluk mbrangkang ajar solah
maneka rupa dolanan cumepak
nanging kabeh padha kadhupak
senajan biyunge nyenyawis mori putih
cempluk tetep moh mapan linggih



nalika mudhun lemah
cempluk mbrangkang ajar solah
nyoba ngluru klasa bedhah
kang kalempit ing senthong omah
tangise prasaja medhar sabda
tan maelu kandhane biyung bapa

ora yung, ora
aja pisan meksa karep
ben rekasa sun sumerep

ora yung, ora
umbaren sun aja digendhong
ben sun bokong bisa nutup klasa bolong

nalika mudhun lemah
cempluk mbrangkang ajar solah
nyoba luru kanyatan
sregep nyinau sangkan paran

**1992

[Budi Palopo]