UDAN ANGIN

St. Sri Purnanto

Angin kenceng wus nibakake udan brahala, dadi banjir pratandha ing lemah kang rengka
Aja! Aja pisan-pisan sambat, senadyan sliramu dicegat topeng menungsa rai waja,
rai mendhung, rai watu, lan rai jaran
iki mono wus zaman udan -- zamane wong wuda wedi kathokan!



Angin kenceng wus nibakake udan geni, dadi banjir bilahi ing bumi kang nyalawadi
Aja! Aja pisan-pisan srei, senadyan sliramu mirsani wong jejogetan nunggang kursi,
nunggang tembang, nunggang buku, lan nunggang macan
iki mono wus zaman udan -- zamane wong wadi wani konangan!

Angin kenceng wus nibakake udan watu-watu, dadi banjir dahuru ing jagad kang remuk rempu
Aja! Aja pisan-pisan misuh, senadyan sliramu weruh wong wadon sengsem diwayuh,
sengsem diblanja, sengsem digodha, lan sengsem digadhuh
iki mono wus zaman udan -- zamane wong wadon wadi kothekan!

Angin kenceng wus nibakake udan prahara, dadi banjir dhuhkita sajembaring bantala
Aja,! Aja pisan-pisan gumun, senadyan sliramu sumurup tumrap kang tangeh lamun
; ha na, wong jungkir — emoh junjung emoh mikir
; ha na, wong walik --- kedawa-dawa mung merga melik
; ca ra, wong sugih ngombe getih -- wong mlarat rebut brekat -- wong bodho seneng digadho
; ca ra, wong pinter padha miber -- wong wadon wadi kathokan -- wong lanang wadi konangan

Angin kenceng wus nibakake udan pralampita, dadi banjir kandha wusana akeh kang padha slenca
Aja! Aja pisan-pisan padu, senadyan sliramu wus pirsa tumrap kang dadi guyu
; pa dha, wong tuwa tatune kedawa-dawa
; pa dha, bocah-bocah wis emoh dadi kebo lan bungah dadi wong gagah

O, iki mono wus udan angin. Apa sliramu wis melu ngedan mung mendem kepengin?

[]

Padhepokan suwung Desember 2007