B U K U

St. Sri Purnanto


Buku, senadyan kok wolak-walika ora bakal dadi kubu kang cidra
jroning wacana, aksara mbaka aksara asung pambagya
marang sadhengah sapa kang wus gelem tresna



Buku uga cendhela ngeblak kang wus asung warta tumrap sadhengah sanak
saka jarak sakilan, ukara-ukara wus paring dalan
driji -driji mlumpat netra, ngambah mbun-mbunan
ing buku bakal tinemu tegese lintang lan rembulan

Buku, senadyan kok bolan-balenana ora bakal dadi kubu kang dora
ombak samodra, utawa mingkup mekaring donya
ing buku dadi cathetan-cathetan kang blakasuta

Buku uga simpanan kawijayan kang ora gampang digrayang
Ing ndhadha ing mustaka aksara mbaka aksara dadi aji-aji
njangkung jangka luhung

Buku, senadyan kok oncal-oncalna ora bakal dadi kubu kang blenja
sari-sarine buku kembang jagad kang mekar mangambar-ambar
mbabar ganda wangi sajeroning nalar gumelar

Buku, kok bukak kok simpen ing laci ora dadi kubu kang selak ing janji
Buku kok gawa kok simpen ing meja ora bakal dadi kubu kang slenca Buku kok usung kok tabung ing sirah ora bakal gumerah
Buku kok dol kok tuku ora bakal dadi maru

Buku kang baku kabuka
Buku uga wis nyathet sekabehing apa lan sapa
Nanging buku, apa wis nulis apa lan sapa tumrap uripmu?

[]

Padhepokan Suwung, Desember 2007