A J I S A K A

St. Sri Purnanto

ajining tresna, jalaran saka pintermu blenja
ajining diri, jalaran saka pintermu ngapusi
ajining salira, jalaran saka akehing bandha
ajining lathi, jalaran saka akehmu muni
ajining raga, jalaran saka akehing dosa
ajining kursi, jalaran saka pintermu kolusi
ajining menungsa, jalaran saka tumindak degsiya
ajining kuasa, jalaran saka tumindak dora
ajining praja, jalaran saka tumindak nistha
ajining wanita, jalaran saka tumindak ngiwa
ajining priya, jalaran saka tumpukan arta



aji aja, jalaran saka uja
aji uja, jalaran saka ija
uja aji, jalaran saka ija
aja ija, jalaran saka aji
aja aja, jalaran saka uja
uja uja, jalaran saka aji
aji aji, jalaran saka aja
aji ija, jalaran saka uja
aja uja, jalaran saka ija
aja aji aji
aji uja uja
aji aji uja
aji aji aja
uja uja ija
aja aja aja
aji aji aji
ija ija ija
a i u
i u
i
ija?
!?
!
[]

Padhepokan Suwung Desember 2007





Geguritan
St. Sri Purnanto

PANGGUNG KEMBANG JINGKRAK


Kembang jingkrak mekrok ngebaki jembaring zaman kang gawe gawok
Yagene Jingkrak?
Oho! Niru bajing kudu sing sigrak !
Yagene Kembang?
Yaho! Gunane cangkem rak kanggo nembang !
Yagene Panggung?
Hoho! Melu numpang ben entuk gunggung !

Aja gawok, yen kembang-kembang jingkrak wis padha mekrok
Aja ngungun, yen gumerahe panggung wis gawe bingung

Panggung kembang jingkrak, mrajak kadya tunggake jarak
Panggung kembang jingkrak, mbrabak pindha urube blarak

O, bobo! Mak gliyung, urip wus mentiyung!
O, yoyo! Mak koming, urip wus montang-manting!
O, hoho! Mak kleyang, urip wus ing awang-awang!

Panggung kembang jingkrak, papane wong mabur sinambi surak
Panggung kembang jingkrak, solahe sing lali bojo lan lali anak
Panggung kembang jingkrak, gumuruh guyu lakak-lakak

Panggung kembang jingkrak? Ora butuh tembang jiwa, ora perlu irama kang manuhara
Panggung kembang jingkrak; wong lanang anting-anting, wong wadon bokong mledhing

“Iki panggung kembang jingkrak, papane wong koming sinambi surak!”

Ing panggung kembang jingkrak, kena ngguyu nanging aja nguloni idu
Ing panggung kembang jingkrak, entuk ngedan nanging aja nyalahne zaman
Ing panggung kembang jingkrak, nadyan mung semu melua surak

[]


Padhepokan Suwung 2007