Sawijining Wektu ing Victoria Park*

Etik Juwita

Dina Akad, rada awan, nyedhaki tabuh rolas wektu Hong Kong utawa meh jam sewelas wektu Indonesia perangan kulon. BMI (Buruh Migran Indonesia) telu nyedhaki saweneh ibu kang miturut gotek anggota DPR kang lagi mertinjo nyang Hong Kong. Ibu kuwi mbrondongake pirang-pirang pitakonan marang para BMI kang padha nggrombol ing sakupenge air mancur poncot kidul-kulon-e Taman Victoria. Nalika gayeng-gayenge wawancara lan katon olehe padha serius, ndadak BMI telu kuwi nyedhaki si ibu kang nganggo klambi ungu nggilap. Lan, dumadi janturan, mengkene:



BMI: Sugeng enjing, eh, siang, Bu!

Bu Ungu: Siang, Mbak. Apa ana uneg-uneg sing bisa dicritakake?

BMI: Ah, boten kok, Bu. Namung kepengin ndherek nrambul rembug mawon. Ibu-ibu lan Bapak-bapak menika sejatosipun ngaten sinten, nggih?

Bu Ungu: (Mentheleng) Lho, iki para anggota DPR RI.

BMI: Oh, ngaten, ta! Mesakke kula niki nggih Bu, kok karo wakile we ora kenal. Lah, tindak Hong Kong menika kersanipun menapa ta, Bu?

Bu Ungu: Perlune nyang Hong Kong iki studi penanganan Flu Burung lan nakyinake kahanane TKI.

BMI: Bab BMI, Bu? Sadangunipun menika menapa ingkang ibu penggalih bab BMI?

Bu Ungu: Ya, sasuwene iki palapuran sing ana ngabarake kabeh becik-becik wae...

BMI: Mangka kanyatanipun rak nggih boten sae nggih, Bu? Ning, napa enggih babarpisan boten wonten palapuran ingkang ngabaraken bab-bab ingkang boten sae?

Bu Ungu: Sasuwene iki durung ana. Lapuran sing ana ngandhakake manawa kahanane para TKI padha apik, ora ana masalah, luwih-luwih sing neng Hong Kong...

BMI: La, napa kabar pahit-getir sing ditulis teng koran-koran niku boten digatekke ta, Bu?

Bu Ungu: Koran, aku ya maca, kapan kae ana TKW asal Indonesia kang disiksa dening majikane.

BMI: Lhadalah, pikantuk kabar ingkang kados makaten menika, lajeng menapa ingkang dipuntindakaken DPR?

Bu Ungu: Ya, mulane saiki pada teka mrene iki pengin ngreti kahanane kang sanyatane, banjur mengko mikirake langkah endi sing prayoga ditempuh.

BMI: Bu, miturut kabar-kabaripun, BMI menika rak penghasil devisa negara, ta? Kula boten patos mudheng devisa menika menapa, ning sajake niku atages para BMI menika boten sakedhik sumbang-surunge dhumateng bab ekonomine negara. Lha, yen pendhak-pendhak wonten BMI sing disiksa majikane trus DPR-e mung nggenahke mrene, kapan rampunge urusane? Mula ta, mula, wis dadi mayit wae isih kelara-lara, kesurang-surang, sok nganti sasen-sasen nginep neng kamar mayit keluwargane wae urung kekabaran. Piye nek ngene iki!

Bu Ungu: Lho, Mbak? Aja emosi ta! Negarane awake dhewe iki lagi repot, angota dewan kait dilantik taun 2004 lagi bisa nyang Hong Kong saiki. Ngene wae sangune cumpen.

BMI: Pun kalih taun nggih? Kawit 2004 ngantos 2006, malah saiki wis ngancik 2007. Lah, sadangunipun menika, napa mawon ingkang Ibu penggalih gegayutan kaliyan kawontenanipun para BMI?

Bu Ungu: (Mentheleng maneh) Prekara buruh kuwi ora mung TKI utawa BMI. Buruh ing Indonesia uga akeh. Indonesia iku gudhange pengangguran. Lan pisan maneh takambali, negara kita kuwi anggarane cumpen, mula aku sakanca lagi bisa dibudhalke mrene saiki iki. Sawise iki mengko bakal dirembug karo pihak-pihak terkait, kepriye prayogane lan amrih bisa mrantasi sakeh prekara kang ana gayutane karo TKI. Mula aja emosine didhisikke. Lha, iki asistenku (nuding saweneh wong lanang), tulung Mbake iki direkam ya, dheweke bakal ngesok panguneg-unege bab TKI.

BMI: Aku arep direkam? Boten mawonlah! Matur nuwun. Aku ora duwe uneg-uneg, pitakonku mung kanggo ibu. Yen ibu wis aras-arasen mangsuli ya uwis, aku ora arep takon maneh.

Bu Ungu: Lho, ngomonga wae. Iki direkam, ben...

BMI: Boten, ah.Matur nuwun. Kula mung pengin rembugan kaliyan ibu, boten kaliyan alat rekam.

Bu Ungu: Ya, wis, foto wae, foto dhisik! Pak…! Pak…! (Ngawe wong lanang kang ngawa kamere gedhe werna ireng).

BMI: Boten usah. Kula boten ayu!

BMI telu kuwi ngunclug ninggalake papan kono. Ngarah barisan BMI kang lagi padha demo.

’’Lah, senenge mung yen dilapuri sing apik-apik wae, mula lapurane ya sing apik-apik wae. Wayahe dicopot tenan, kok!’’

’’Apane sing dicopot?’’

’’Ya kabeh, ya ngisorane, ya ndhuwurane!’’

’’Lha, rak mbligung yen ngono....???!!’’

’’Hahahaha....!!’’[]

(Hong Kong, nalika rombongan DPR RI dicegat BMI ing
Bunderan Air Mancur, Victoria Park, November 2006)

*) Irah-irahan asline Victoria Park Suatu Ketika, dikirim nyang milis kossta@yahoogroups.com, banjur dijarwakake dening Bonari Nabonenar. Etik Juwita iku BMI asal Blitar, sawatara crita cekake wis mblabar kawat ing media cetak kang kababar ing Hong Kong (Berita Indonesia, Intermezo, lan liya-liyane) apadene media cetak babaran Indonesia (Jawa Pos, Surya, Sinar Harapan). Crita cekake Etik (BMI-HK asal Garum, Blitar} kang judhule Bukan Yem, nat ekapacak ing Jawa Pos, mlebu 20 Cerpen Terbaik Indonesia 2008 kang dipilih dening Pena Kencana, bukune kababar dening Gramedia Pustaka Utama, dikepyakake wulan Maret 2008 iki ing Jakarta.