NGARANIRA
dening
Didik Supriadi
Delanggung hamung
hanggungguh dhiri
nyawang kekiprahe si
pawong pamengkang kardi
sing linambaran
gelaring zamrut warna canthoka
kekadhalan tuwuh subur
tanpa tinandur asta
sing mangsa kalane
manembrama
kanthi kidung sepi
panglilihe ati
mesat ing carita:
“lelakune paraga catur
lan padha rukun hangentasi
karya Sang Aji,
hamiji, haniti, nyaruduki nganti teka pepati
lamate padha kisruh
miwir antawecanan
kanggo Willen pomah
kumpeni sing wis madeg tanpa caturan
bisane mung namati
dalan rumpek kebak pasulayan”
anon, tinon, takon,
nemahi laku Ismaya
anggone paring pawarta
mesusi mono rally dimen ketiban daya
panambake tuk lan
curug nganggo pipa walanda
dimen handana warih,
handana luwih, handana jelih
tanpa jirih abusana
siswa atameng wesi mobahke ngelmi
apeparap sarjana
srenggala pati
sajroning gurit
mangambar ganda sekar kumambang
ginelar thukul tanpa urea, ginulung mbilung tanpa pepetung
dadi papan pangudarasa
sangarepe pandhapa agung
nalika iku, napaki
mangsa gedhene sumber
prabane manggalasthi
ambuka pang ron sinengker
ingaranan murud
dhadhung sarira
Ungaran,
6 Desember 2013
Bel
Geduwel Beh
Dening
Didik Supriadi
jatahe numpak sepur
malah ketampan nganggur
jatahe parak sunan
ujube maring sumawanan
timbang ngleker alah
sayang maring Pak Dokter
I
rasa seger hawa angler
nggo tambane geter ati
sing nandang ser-muser
kateter padhatan
kasamper gaweyan dadi lumayan
alah jebul keplangkrak
aneng blumbang siwarak
papan raharjane bening
tanpa tambuhan keling
obat putih, bronjong
tapih, apa maneh ampas kluwih
sing ngarengga iline
banyu (Gusti) sing sarwi merak ati
dadine, gawe gorehe
awak petruk sing ketungka-tungki
II
rasa madu tanpa tutur
lan olah suka
kanggo tamba katarak karbon
nglemprake dioksida
madhani blarake netra,
idhep-idhep tunggu nata
alah jebul aneng papan
asmara ngalaras hayu yuwana
ngombyaki sapta rasa
sing suwe angler datan sasami
dening kentrung, kenthong
siomay sung padha makarti
mrabawa adi aneng tabuhan
lan tetembangan lir resepsi
ana kalane, sang ratu kawimbuh
lawuh pupu sakombenan ugi
III
milang-miling ngupadi
tambane kembung
gumalundhung galudhug maweh
lesuse kedhung
panyimpen satru murka
kadi sasra sata ing tengah grumbulan
ngrasuk gubug mangkring
engking kinempleng tuhu
maneka tedha den
sambrama
dimen kasok kardi
sesasi nganti lali dandang gumlonthang
den ucap, “alah mangsa
alah pira!”
ning jebule, kanthonge
bolong luput tembelan
IIII
Jatahe rabi ambok dilekasi,
aja nganti dadi ekspansi
angrampungi sewu
dedonga siji pangaji
ben apa sebut: sang ratu,
kanthong bolong, bel geduwel
si petruk kudu panggah
bali myang prayitneng karti
ora amung klencer lumaku
amunge goleke turu lan
sangu
Ungaran,
6 Desember 2013
GETHUK
KETHEK
dening
Didik Supriadi
iki wis daksawang lan
dakrasakake
wujud mrengut warna
coklat esem
sing sakala dadekake
sasra kandha sewu pamundhutan
“rupa meneka warna iki
aja koksemayani
nganggo suwe lan janji
barat sacempe
amarga slageyan wis
katon ngawe ngece
ngambus-ambus receh
lan kulub kertase”
Gethuke gethuk kethek
digeget mathuk,
kepenak yen malethek
Iki wis takgelung
aneng pamikete
ombyake kahanan ora
mung tiba dadi sulaya
sing sakala dadekake
sasra kandha sewu pamundhutan
“ora gampang anggonmu
gambuh atunggal kardi
samangsa karemanmu
amung kulakan sata tahu
jinarweng bakso sing
maweh puji rahayu
jebul, salira iki wis
niti laku karyenak satuhu”
gethuke gethuk kethek
gelemu yen kethuthuk,
kepara dadi theklek
iki dudu reka dayane
tukang dagang hore
ing kene papan tahu
sing pranyata rukun tetunggalan
sarasi sawiji satiti
tata tur adi ta?
“wiwit biyen datan
prabeda
ora kengguh kudu amasang
umbul prandha
amung wimbuh emane
kerep katrajang squer kajejer
sing kebak sarinthil
narabas jegur uwur bubure”
jebul gethuke wis ameh
lis antek
bakale, ora bakal
dakkulak kanggo sutresnaku
tundhane, daktuku
kanggo tambaku
Cakra
Sewu Dupa, 6 Desember 2013
0 comments:
Post a Comment